होमपेज / खेलकुद
काठमाडौँ । विश्वकप २०२६ मा फ्रान्सका स्टार फरवार्ड एम्बाप्पेले दुई गोल गर्दै इराकविरुद्ध ३–० को सहज जित दिलाएका छन् । सोमबार राति भएको खेलमा खराब मौसमका कारण दोस्रो हाफ करिब दुई घण्टा ढिलो सुरु हुँदा प्रतियोगिताको अहिलेसम्मकै सबैभन्दा लामो मौसमजन्य अवरोध देखिएको थियो ।
एम्बाप्पेले गरेका दुई गोलबीच झण्डै तीन घण्टाको अन्तर रह्यो । पहिलो गोल खेलको १४औँ मिनेटमा गरे भने दोस्रो गोल मौसमका कारण भएको लामो अवरोधपछि सम्भव भयो । यससँगै एम्बाप्पेको विश्वकपमा कुल गोल संख्या १६ पुगेको छ, जसले उनलाई जर्मनीका पूर्व स्ट्राइकर मिरोस्लाभ क्लोजसँग बराबरीमा पुर्याएको छ ।
यसअघि अर्जेन्टिनाका कप्तान लियोनल मेसीले अस्ट्रियाविरुद्ध २–० को जितमा दुई गोल गर्दै विश्वकप इतिहासमा १८ गोलसहित नयाँ कीर्तिमान बनाएका थिए । गोल्डेन बुटको दौडमा पनि एम्बाप्पे चार गोलसहित मेसीभन्दा एक गोलले मात्र पछाडि छन् ।
फ्रान्सका लागि अर्को गोल वर्तमान बालोन डी’ओर विजेता उस्मान डेम्बेलेले गरे। लगातार दोस्रो जितसँगै फ्रान्सले समूह ‘आई’ मा ६ अंक जोडेको छ र नकआउट चरणमा स्थान बनाएको छ ।
दुई खेलबाट अंकविहीन रहेको इराक अझै प्रतियोगिताबाट बाहिरिएको छैन । उत्कृष्ट तेस्रो स्थानका टोलीहरूलाई पनि नकआउट चरणमा अवसर दिइने भएकाले अन्तिम खेलमा सेनेगललाई हराउनुपर्ने दबाब इराकमाथि रहेको छ ।
ADVERTISEMENT
