होमपेज / राजनीति
सुर्खेत । स्थानीय तह निर्वाचनको मत परिणाम आउने क्रम जारी छ । पछिल्लो समय आएका मत परिणामअनुसार नेपाली कांग्रेसले २ सय भन्दा धेरै पालिकाको नेतृत्व पाएको छ ।
देशभरका ७५३ स्थानीय तहमध्ये २ सय २ पालिकामा कांग्रेसको जित भइसकेको हो ।
कांग्रेसले अहिले गणना भइरहेका १ सय ९२ पालिकामा अग्रता लिइरहेको छ ।
यी सबै पालिकामा कांग्रेसले जितेको खण्डमा ३ सय ९४ पालिकामा जित हासिल गर्नेछ । यो ५२ प्रतिशतभन्दा केही बढी हो ।
यसलाई आधार बनाउँदा कांग्रेस यो स्थानीय तह निर्वाचनमा पहिलो पार्टी बन्ने निश्चित भएको छ ।
कांग्रेसलाई अहिले नेकपा एमालेले पछ्याइरहेको छ । एमालेबाट १ सय २६ जनाले पालिका प्रमुखमा जित दर्ज गरिसकेका छन् । त्यस्तै, गणना भएका ७४ पालिकामा नेकपा एमालेले अग्रता लिएको छ । यी दुवै जोड्ने हो भने एमालेले २ सय पालिकामा नेतृत्व पाउने छ ।
तेस्रो दलको रुपमा नेकपा माओवादी केन्द्र देखिएको छ । नेकपा माओवादी केन्द्रले अहिलेसम्म ८७ पालिकामा जित हासिल गरिसकेको छ । उसले ३० स्थानमा अग्रता कायम राखेको छ । यी सबै ठाउँमा जित निकालेको खण्डमा उसको पोल्टामा ११७ स्थानीय तहको नेतृत्व जाने देखिन्छ ।
सत्तारुढ गठबन्धनका अरु दुई दल नेकपा एकीकृत समाजवादी र जसपा तुलनात्मक रुपमा कमजोर देखिएका छन् । अहिलेसम्म भएको गणनामा जसपा नेपालले ५ स्थानमा जित निलेको छ भने २७ स्थानमा उसले अग्रता लिएको छ ।
नेकपा एकीकृत समाजवादीले भने ७ पालिकामा नेतृत्व पाएको छ । अब उसले १३ स्थानमा अग्रता लिएको छ ।
उपप्रमुखको सन्दर्भमा पनि नेपाली कांग्रेस नै अगाडि देखिएको छ । अहिलेसम्म गणना भइसकेको स्थानीय तहमध्ये १९१ स्थानमा उपप्रमुखमा नेपाली कांग्रेसले जित हासिल गरेको छ ।
दोस्रोमा देखिएको नेकपा एमालेले १२८ स्थानमा जित हासिल गरिसकेको छ ।
त्यस्तै, माओवादी केन्द्रले ९४, जसपा नेपालले ७, एकीकृत समाजवादीले १३ स्थानमा उपप्रमुखमा जित निकालेका छन् ।
