होमपेज / समाज
भक्तपुर । पढ्ने रहरलाई उमेरले छेक्दैन, उच्च शिक्षा पढ्ने चाहनालाई निरन्तर प्रयासले सफलता पाउँन सकिन्छ भन्ने उदाहरण यतिखेर ६० वर्षीया रमिनकुमारी राईले चरितार्थ गरेकी छन् ।
उमेरमा गाउँघर, विवाह, छोराछोरी हुर्काउने लगायतका विभिन्न कारणले पढाइको चाहनालाई बीचमै छाडेकी राईले यसवर्ष ६० वर्षको उमेरमा मध्यपुरथिमि नगरपालिका–३ गठ्ठाघरस्थित आस्था महिला विद्यालयले पूरा गरिदिएको छ ।
अधूरो शिक्षालाई जोड्दै उच्च शिक्षा पढ्ने चाहना बोकेकी राईले उक्त विद्यालयमा कक्षा आठमा आएर भर्ना भएर पढाइलाई निरन्तरता दिँदा यसवर्षको एसईई परीक्षामा सफलता हात परेको छ । अष्ट्रेलियामा बसेको छोराको परिवारमा १०० वर्षकी सासुलाई घुमाउन लिएर गएकी राईले अष्ट्रेलियामा रहँदा नै आफू एसईई उत्तीर्ण भएको खबरले खुसी हुँदै हरेश नखाई निरन्तरको मिहेनतले सफलता दिन्छ भन्ने भनाइ चरितार्थ भएको बताइन् ।
विद्यालयकी निमित्त प्रधानाध्यापक बिना देउजाले राई मात्रै नभई यसवर्ष आठ जना आमा, हजुरआमाले एसईई परीक्षामा सफलता हात परेको उनले बताइन् । उनले एकसाता पछि नेपाल फर्किएर राईले कक्षा ११ अध्ययन गर्ने चाहना व्यक्त गरेको उनले बताइन् । यसवर्ष राईसँगै ५९ वर्षीया राधिकादेवी आचार्य, ४२ वर्षीया ललिता आले मगर, २९ वर्षीया सुष्मा खड्का, २८ वर्षीया निर्मला चेपाङ, २२ वर्षीया रस्मी ऐरी, ४३ वर्षीया कृष्णमाया तको र ४१ वर्षीया कुमारी तामाङले पनि यस पटकको एसईई परीक्षा उत्तिर्ण गरेका उनले जानकारी दिइन् ।
उनले भनिन्, ‘यसवर्ष आठ जना आमा हजुरआमाले एसईई परीक्षा उतीण गर्नु भएको छ, यसअघि पनि हरेक वर्ष आमा, हजुरआमाले एसईई उत्तिर्ण गर्नु भएको थियो, कतिपय आमा, हजुरआमाले कक्षा १२ उत्तिर्ण गरेका छन् । पढ्ने रहर र चाहनालाई उमेरले छेक्दैन भन्ने उदाहरण हाम्रो विद्यालयमा धेरै छन् ।’ पढ्ने उमेरमा विद्यालय र कक्षाकोठा कहिल्यै नदेखेकी बारा जिल्ला निजगढ घर भएकी ललिता आले मगरले ४२ वर्षको उमेरमा एसईई परीक्षा उत्तिर्ण गरिन् । आर्थिक अवस्था कमजोर भएका कारण स्कुल छाडेर गोठालो जाँदा थाति राखेको पढ्ने रहरलाई पूरा गरेकी मगरले कक्षा ११ भर्ना हुने बताउँछिन् ।
चौध वर्षकै उमेरमा विवाह गरेकी उनले ड्राइभिङ सिकेर गाडीको लाइसेन्स लिएर बनेपाको सलाई उद्योगको डेलिभरी भ्यान चलाएपछि चार वर्ष दुवई र दुई वर्ष कुवेत बसेर नेपाल फर्किएको आलेमगर एसईई पास भएपछि अब कक्षा ११ पढ्ने बताउँछिन् । बीचमै पढाइ छाडेर पढ्ने रहर पूरा नगरेका महिलाहरुका लागि २०६५ सालमा स्थापना भएको विद्यालयबाट १७ वर्षे किशोरीदेखि ७२ वर्षकी हजुरआमासम्मले एसएलसी र एसईई परीक्षा उत्तिर्ण गरिसकेको उनी बताउँछिन् ।
विभिन्न कारणले विद्यालय जानबाट वञ्चित भएका महिलालाई औपचारिक शिक्षा दिएर विद्यालयले शिक्षा क्षेत्रमा महत्वपूर्ण योगदान दिँदै आएको बताउँदै उनले १२ वर्षको अवधिमा १६० जना आमा, हजुरआमाले एसएलसी र एसईई परीक्षा उत्तिर्ण गरिसकेको निप्रअ देउजा बताउँछिन् । विद्यालयबाट एसईई उत्तिर्ण गर्ने एक दर्जन बढीले स्नातकसम्मको अध्ययन पूरा गरेर समाजमा स्थापित भएको पाउँदा निकै खुसी लाग्ने गरेको बताउँदै उनले विद्यालयमा भक्तपुरका ग्रामिण क्षेत्रदेखि उपत्यका र विभिन्न जिल्लाबाट जिल्लाबाट विद्यार्थी आउने गरेको देउजाले बताइन् ।
धादिङ घर भएकी २८ वर्षीया निर्मला चेपाङको परिवारमै पहिलोपटक एसईई उत्तिर्ण गर्ने महिला हुन् । मध्यपुरथिमि–३ कौशलटारमा अर्काको घरमा काम गर्दै चेपाङले छ वर्ष आस्था महिला विद्यालयमा पढेर यसवर्ष एसईई उत्तिर्ण गरेकी हुन् । रासस
ADVERTISEMENT
